១. សម្រាកសិនទៅ
វិធីតែមួយដែលអាចឲ្យយើងបាត់ខ្ជិលបាន គឺត្រូវសម្រាក ត្រូវឈប់ ព្រោះនៅពេលដែលយើងកំពុងខ្ជិល ប្រាកដជាគ្មានចិត្តចង់ធ្វើអ្វីបានល្អទេ ទោះបីខំប្រឹងធ្វើបន្លប់ៗក៏លទ្ធផលចេញមកវាមិនសូវល្អដែរ។ ដូច្នេះហើយគួរសម្រាកតែម្ដង រួចហើយសឹមតាំងជំហរឲ្យល្អឡើងវិញ។ តែមិនមែនខ្ជិលពេលណាក៏សម្រាកពេលហ្នឹងទេ គឺត្រូវគិតទុកថានឹងឈប់សម្រាកយូរប៉ុណ្ណា ហើយការងារដែលត្រូវធ្វើនោះប្រញាប់កម្រិតណាផង។
២. ស្វែងរកមូលហេតុថាខ្ជិលព្រោះអ្វីមានមនុស្សតិចអ្នកប៉ុណ្ណោះដែលចំណាយពេលអង្គុយវិភាគខ្លួនឯងថាហេតុអ្វីខ្ជិលធ្វើការ ខ្ជិលរៀន ខ្ជិលធ្វើនេះខ្ជិលធ្វើនោះ ប៉ុន្តែបើបានដឹងមូលហេតុថាខ្ជិលព្រោះអ្វីហើយ វានឹងធ្វើឲ្យយើងបាត់ខ្ជិលបានកាន់តែលឿន ដូចជាខ្ជិលដោយសារញៀនហ្គេម ញៀនមើលរឿងភាគក៏មិនចង់ធ្វើអ្វីផ្សេង ព្រោះថាហេតុផលភាគច្រើនដែលនាំឲ្យយើងខ្ជិលនោះគឺដោយសារយើងញៀននឹងអ្វីមួយខ្លាំង រហូតមិនចង់ធ្វើអ្វីផ្សេងទៀត។ នៅពេលដឹងមូលហេតុហើយ យើងក៏អាចរកវិធីកែខៃបានមិនលំបាកទេ គឺគ្រាន់តែបែងចែកពេលវេលាខ្លះ/ធ្វើអ្វីដែលយើងចង់ធ្វើ នោះភាពខ្ជិលនឹងត្រូវកាត់បន្ថយ។
៣. រកគោលដៅជំរុញចិត្ត
ធ្លាប់ប្លែកក្នុងចិត្តអត់ថាហេតុអ្វីអ្នកខ្លះឧស្សាហ៍រៀន ឧស្សាហ៍ធ្វើការម្ល៉េះ? ការដែលពួកគេឧស្សាហ៍គឺដោយសារពួកគេសុទ្ធតែមានគោលដៅ មានគ្រួសារ មានមនុស្សជាទីស្រឡាញ់ ឬអ្វីក៏ដោយ ដែលជាគោលដៅជំរុញចិត្តគេឲ្យកម្ចាត់អារម្មណ៍ខ្ជិលបានយ៉ាងមានប្រសិទ្ធភាពបំផុត ព្រោះនៅពេលដែលយើងដឹងថាយើងត្រូវការអ្វី ធ្វើព្រោះអ្នកណា។ ទោះបីខ្ជិលខ្លះ តែនឹងអាចទាញសតិខ្លួនឯងបានកាន់តែលឿនពេលនឹកដល់គោលដៅ។
៤. រៀបចំគម្រោងការងារប្រចាំថ្ងៃ មនុស្សជាច្រើនគ្រាន់តែឃើញបរិមាណការងារដែលត្រូវធ្វើ បរិមាណសៀវភៅដែលត្រូវអានក៏មានអារម្មណ៍ថាចង់ខ្យល់ចាប់ ហើយក៏មានអារម្មណ៍ថាខ្ជិលអស់កម្លាំងភ្លាម។ ដើម្បីកុំឲ្យមានអារម្មណ៍ថាមានការងារគរច្រើន អ្នកត្រូវយកការងារមកបែងចែក ហើយយកវាមកធ្វើម្ដងមួយៗ ចៀសវាងឃើញការងារច្រើនហើយក៏ខ្ជិល ចាំស្អែកហើយស្អែកទៀត រហូតដល់ពេលទឹកដល់ច្រមុះទើបស្រវេស្រវា។
៥. កែប្រែខ្លួនតាមសម្រួល
បើអ្នកជាមនុស្សខ្ជិល ខ្ជិលដល់កំពូលហើយ នៅសុខៗចង់ប្រែខ្លួនឲ្យទៅជាឧស្សាហ៍ក្នុងមួយប៉ប្រិចភ្នែកក៏មិនអាចទៅរួចដែរ។ វិធីល្អបំផុតគឺត្រូវប្រែខ្លួនបន្តិចម្ដងៗតាមសម្រួល។ កុំភ្លេចថាភាពខ្ជិលវានៅនឹងចិត្ត មិនមែនដោយសាររាងកាយនោះទេ ហើយចិត្តគឺជាអ្នកគ្រប់គ្រងរាងកាយ ដូច្នេះធ្វើយ៉ាងណាកុំឲ្យភាពខ្ជិលច្រអូសមកគ្របពីលើអ្នកបាន។
យ៉ាងណាមិញ ភាពខ្ជិលក៏មិនប្រាកដថាមិនល្អរហូតដែរ ព្រោះពេលខ្លះភាពខ្ជិលនេះហើយដែលនាំឲ្យមានការច្នៃប្រឌិតផ្សេងៗ។ ឧទាហរណ៍រថយន្តមានកំណើតឡើងព្រោះមនុស្សខ្ជិលដើរ ដូច្នេះបើអ្នកកំពុងខ្ជិល នោះក៏អាចមានការគិតល្អៗណាមួយកើតឡើងក៏ថាបាន។ អ្វីដែលសំខាន់នោះគឺកុំឲ្យភាពខ្ជិលគ្រប់គ្រងអ្នកបានគឺល្អហើយ ៕ប្រភព៖ NewsSabay សម្រួល៖ KddNewsToday
No comments:
Post a Comment